Nòt enfòmasyon konsènan fòmasyon sou reparasyon telefòn selilè nan Sen Lwi di Nò
Direksyon Jeneral Ògan Ekzekitif Konsèy Nasyonal Telekominikasyon (KONATEL) pran plezi enfòme piblik la an jeneral ak laprès an patikilye ke li sot òganize yon fòmasyon nan reparasyon telefòn selilè pou 24 jèn fi ak jèn gason nan Sen Lwi di Nò, Depatman Nòdwes nan dat ki te 10 pou rive 12 mas 2017 la, nan kad pwogram li mete sou pye ki batize « REPARE NÈT » nan objektif pou pèmèt zouti teknoloji yo ede nan devlopman sosyal ak ekonomik sitou nan mitan jèn yo. Chak patisipan yo te resevwa yon sètifika ak yon bwat zouti.
KONATEL ap kontinye ankouraje tout jèn ki deja swiv fòmasyon sa yo pou mete yo an pratik, non sèlman nan bay sèvis ak onètete, epi pataje yo ak lòt ki nan vwazinaj yo, nan lide pou konbat lamizè nan mitan yo.
Direksyon Jeneral la ap raple ke plis pase 100 jèn nan komin Kafou, Taba, Petyonvil, Okay ak Sen Lwi di Nò deja jwenn fòmasyon, sètifika ak bwat zouti pou kòmanse ti biznis yo prese prese.
Jean Marie ALTEMA
Direktè Jeneral